9月25日係2位主角既大日子....為左迎接lee日既來臨,大家都要係百忙既日子中作出準備,我除左準備自己還要準備埋阿妹,由化妝,衣服,鞋,袋...都一 一係一個月內襯好...其實本身擺酒係12月,所有野就可以慢慢搞,但點知我家姐冇啦啦決定係9月註冊,咁大家都好急忙咁準備....anyway主角係最重要既,咁大家唯有盡量迎合啦....

整裝待發,各人精精神神出發去註冊處,因為預早到註冊處所以大家都有時間影下相....不過果日都幾熱下...一路影相一路出汗....,都幾辛苦~~

第一次見到家姐著婚紗,感覺佢大個女喇....哈哈....不過佢個妝就勁左小小....希望到擺酒果日佢更加靚,更加索啦....今次大家都有采排經驗,到擺酒時候大家應該冇咁緊張,笑得更開心....原來呢讀誓詞既時候真係好緊張架,,,,雖然我只係拍movid都感覺到自己心卜卜跳,何況係2位主角,讀到甩甩卡卡....都幾搞笑既....其實我覺得最可惜既係冇請到攝影機,搞到要自己影相...所以氣氛都差左小小,,,,希望擺酒果日更加更加好....

第一次著one pice,著住對2吋半既鞋成大半日,真係好辛苦呀,終於到換衫既時候,嘩好似解脫一樣....著返波鞋對腳真係好舒服...換左條裙成個人都輕鬆哂....一鬆懈個人就肚餓....去到酒樓食飯更加覺得d野好好食,可能係餓既關係啦.....唔知擺酒果日會點呢,,,應該仲更加辛苦....冇計啦,始終都係開心事....我都會盡心盡力既....

是習慣..是心癮...還是需要,好多時我都搞唔清,係累既時候,我更覺得好需要你既出現,我講既係其實係咖啡...lee排太習慣返工要飲飲咖啡提提神,差不多每日最少一杯,一日唔飲過都會心掛掛...雖然咖啡俾到清醒,精神既力量,但我都知唔可能依賴,更知多飲對身體唔好,但lee個習慣就好似人地食煙一樣,明知唔好都係改不了既壞習慣...不過我好希望可以盡量減少,因為我唔想咁快有骨骼疏鬆,或者已經有....飲少d對皮膚都好d...希望我戒到心癮啦....

除左咖啡另一樣令我上癮既就係零食...lee樣野我真係點戒都戒唔到,因為冇任何野可以代替佢,係我做野好攰好攰既時侯,最享受既係可以靜靜地食零食既時刻,係心情唔好零食更加可以係主角,不過零食既癮俾咖啡細...一個月食一次倆次已經足夠....

年紀大喇,睇既野都唔同喇,以前會覺得自己仲後生有本錢,食得太多唔健康既食物,係時候要節制下,唔係三十未到俾人以為係師奶幾唔好呢....lee排日日收工經過中環都見到有人影婚紛相,比著前幾年既我,我會好羨慕,但宜家開始有點反感,同見到bb一樣,以前我都會好似同事嗡會好主動同bb玩,仲會玩得好開心,宜家開始對bb有反感,尤其係bb喊聲.......唔通我對結婚,bb有恐懼症...

第一次食尼泊爾菜食後感係....唔多岩食,首先梗係要多謝我2位尼泊爾同事煮佢地既家鄉菜,我先有機會試到啦~

記得試左4樣食品,第1樣係佢地既炸包包條,感覺似油炸鬼同煎對既mix版, 第2樣係咖哩薯仔味道都幾辣,第3樣係炒苦瓜味道係勁苦...最後係蘿白炆雞味道竟然係大陸成日食到既蘇蘇香草味....可能我食開淡味,太濃味我都係唔多岩食...但同事話已經就我地辣已經係小辣,苦更加係唔覺苦,真係對唔住我本身已經夠苦,所以唔食苦瓜..哈哈~

不過lee排福食有蒸魚,冬菇蒸雞,豉汁蒸排骨,青紅蘿蔔湯,花生雞腳湯,冬瓜排骨湯,始終都係中國野岩食d亦估唔到我既尼泊爾同事都好鐘意食中國野....

流沙奶黃包同芒果黑糯米甜品,其實味道都ok係感覺差小小啦,我叫佢a貨啦因為整得幾似架喇~

依然咁滑既口水雞走辣版同雞油浸菜,味道都唔錯~

有蛋香既蔥油餅真係好正,變細版鍋貼都可以

擔擔麵真係好好味可惜變左bb版,係超市見到三水妹,買左返嚟哈哈~

唔記得上次係幾時食過lee間川菜,只記得好好味同好平,今次決定再返深圳再去探訪,得返嚟既結果係預計唔到~

今次返去一心係為左家姐婚禮作準備,,,及順便去食多次lee間川菜,買野都好順利係3個鐘內已經買到所需要既野,因為時間問題我地點到已經前往食川菜既附近,因為唔熟路,我地沿地鐵站經過商場再過去,真係天有不測之風雲,行商場既時候突然傍陀大雨....好似黑雨咁大雨,本身諗住搭的士去食野既,問路後知道原來好近,咁細雨我地就行過去...可能太大雨喇,水浸既情況就出現,我一對入哂水既腳真係好難形容,雖然行錯左方向最後都唔難搵到,一心抱著其望既心態去食餐好野,回味一下....

一坐底我同阿妹已經入廁所處理下對水鞋,入到廁所竟然見到有個洗衣機,我仲諗e可以整乾對襪,點知唔work既,可能太輕部野feel唔到有野啦,咁算啦,出到去想叫野既時候,我朋友同我講你睇下,間野加哂價,我一睇係wo,以前食都係廿幾至四十幾,宜家加左成陪,但冇計啦都坐底左,又咁辛苦行過嚟貴左都要食架啦,味道上變化唔太,只係份量變化太大,即係又貴又細左...唔怪得星期日既晚市都唔太多人....不過值得一讚既係有現場中樂表演(chiness live band)哈哈...咁岩我叫左菊花茶飲,又叫左菊花魚食,我仲講有菊花台聽呢就原美喇....估唔到食完野真係有菊花台聽...真係俾佢加返分,不過今次應該係最後一次,同類形既太多選擇喇,可惜..真可惜~

原來回憶既事永遠係最好,再尋找出來既答案永遠都再唔一樣~

世事既野就係咁....有些好愛既人就無緣見面,有些你不愛既人又常常遇到,究竟係緣份再相遇定係前世有仇,今世要還....講緊既只不過係我既舊老闆,年頭轉新工已經撞過一次,今次再轉工又再撞到多一次,好似去到邊到到撞到佢地....夠喇...我唔想再撞到你地,每次再見面我都會好尷尬,每次再見我都覺慚愧,慚愧係離開佢公司之後一直都未搵到同等人工既工作,好似好冇用咁....唉~

雖然現在既公司人工唔高,但公司既工作量係同人工係對等既...點解我咁講呢,係有事實既根據,因為唱完通宵k訓得3個鐘照返工,一d問題都冇,又冇做錯過,起初第一個星期已經覺得好舒服,冇咩辛苦既感覺,到第二個星期要調去金鐘發覺仲舒服,因為淨係忙lunch time,一過左3點可以講係悶....仲要可以放星期六,日真係估到估唔到,起初為左快d搵到工先見lee份工,估唔到入到一間好憂遊既工...最令我驚訝既係公司福食,4-6個人食竟然可以有蝦,有蟶子,有湯有糖水...有時會有燒味,有豉油雞,燒鵝,叉燒,分蹄,真係有菜有肉...間中仲有pizza,burger king,真係食到人到癲....唔知之後會唔會再有咁好既福食,其實我已經好心滿意足,仲有公司有唔錯咖啡,我又搵到好飲既咖啡....